Украина Олий радаси 2020 йилдан конституциянинг 80-моддасига киритиладиган депутатлик дахлсизлигини бекор қилувчи ўзгартиришларни маъқуллади, дея хабар бермоқда «Интерфакс-Украина».
Сешанба куни парламентнинг ялпи мажлисида 373 нафар халқ депутати янги қонун лойиҳасини маъқуллаган. Конститутсияга киритилган ўзгартиришларни якуний тасдиқлаш учун, камида 300 овоз керак эди.
Қонун кучга кирганидан сўнг Украина конституциясидан депутатларни парламент розилигисиз жиноий жавобгарликка тортиш, ҳибсга ёки қамоққа олишни тақиқловчи депутатлик дахлсизлиги кафолатланганлиги тўғрисидаги низом чиқариб ташланади.
Депутатлар парламент ва унинг органларида овоз беришда ҳамда ўз фикрини баён қилганликлари учун қонун олдида жавобгар бўлмайди. Бироқ ҳақорат ёки туҳмат учун жавобгарлик бундан мустасно.