Сеул Пхенян жанговар тажриба учун Украинага қўшин юборишни бошлаганини айтди. Шимолий Корея Россиянинг Украинадаги уруши учун қурол етказиб беришда айбланган.
Шимолий Корея аскарлари Украинада жанг қилмоқда, уларнинг баъзилари ҳалок бўлди, дейди Сеул.
Жанубий Корея Шимолий Корея қўшинлари Украинада руслар билан бирга жанг қилаётгани ва уларнинг баъзилари ўлдирилгани «эҳтимоли юқори»лигини айтди.
Жанубий Корея мудофаа вазири Ким Ён Хён парламентдаги тингловда Украинада Шимолий Корея ҳарбий зобитлари ўлдирилгани ҳақида хабарлар борлигини маълум қилди.
«Биз турли вазиятларни ҳисобга олган ҳолда Украинада Шимолий Корея зобитлари ва аскарлари орасида қурбонлар бўлиши эҳтимоли юқори, дея ҳисоблаймиз», — деди у.
Кимнинг айтишича, Шимолий Корея етакчиси Ким Чен Ин ва Россия президенти Владимир Путин ўртасида июнь ойида имзоланган ўзаро мудофаа шартномаси доирасида Шимолий Корея қўшинлари кўпроқ жойлаштирилиши кутилмоқда.
Украина матбуоти 3 октабр куни Донетск яқинидаги Россия томонидан босиб олинган ҳудудга Украина ракета ҳужуми оқибатида Шимолий Кореянинг олти ҳарбий зобити ҳалок бўлганини хабар қилган эди.
Сеул Пхенянни Россияга қурол жўнатганликда айблади, Шимолий Корея ҳам, Москва ҳам буни рад этди.
Айни пайтда экспертлар Шимолий Корея қурол етказиб беришдан жанговар тажриба учун қўшин юборишга ўтаётганини айтишмоқда.
