Украина Харьков ва Черниговни оммавий ўққа тутганини хабар қилди

Украина манбаларига кўра, Россия кучлари Харьков ва Чернигов шаҳарларига йирик ҳужумлар уюштирган.

Харьков мэри Игор Тереховнинг сўзларига кўра, 21 октябрга ўтар кечаси шаҳарга бошқариладиган ҳаво бомбалар (ГАБ) билан зарбалар берилган.

“Ҳужум натижасида Саноат туманидаги 15 та турар-жой биноси вайрон бўлди, 9 киши яраланди”, — деди шаҳар раҳбари.

Украина Фавқулодда вазиятлар давлат хизмати (СЭС) ва тиббиёт ходимлари ҳозирда жабрланган ҳудудларда ишлаётгани маълум қилинди. Бу ҳақда Харьков вилояти ҳарбий бошқармаси раҳбари Олег Синегубов маълум қилди.

Чернигов вилояти ҳарбий бошқармаси раҳбари Вячеслав Чауснинг маълум қилишича, Россия қўшинлари вилоятга ҳам йирик ҳужум уюштирган ва икки жамоадаги иссиқлик ҳамда электр иншоотларига зарба берган.

“Минтақа ҳужумчи учувчисиз учоқлар томонидан катта ҳужумга учради. Ҳаво ҳужумидан мудофаа кучлари маълумотларига кўра, сўнгги 24 соат ичида 51 та ҳаво нишонлари, жумладан, иккита баллистик ракета аниқланди”, — деди у.

Ҳужумлар натижасида Чернигов ва унинг шимолий туманларида электр таъминоти узилган.
Энергетиклар таъмирлаш ишларини олиб боришмоқда. Муҳим инфратузилмалар генераторларга уланган, айрим фавқулодда ҳолат марказлари фаолият бошлаган.

Украина Ҳаво кучларининг маълумотларига кўра, бир кечада Россия томонидан мамлакат ҳудудига 98 та дрон ва 6 та ракета билан ҳужум қилинган.

58 та дрон уриб туширилган ёки электрон уруш тизимлари орқали нейтраллаштирилган. 10 та жойда 37 та дрон зарбаси қайд этилган, яна икки ҳудудда вайрона бўлган бинолар аниқланган.