Украина махсус кучлари Россия ҳарбий разведкачисини асирга олгани айтилмоқда

Украина махсус кучлари Россия билан давлат чегараси яқинида пистирма уюштириб, россиялик ҳарбий разведкачини асирга олгани хабар қилинмоқда. Украина ОАВ ёзишича, у дрон ёрдамида Россия кучларининг ҳаракатланиш йўналишларини белгилаб борган.

Маълумотларга кўра, чегара ҳудудида махсус вазифани бажараётган Украина гуруҳи россиялик ҳарбийни пистирмада қўлга олган.

Таъкидланишича, у учувчисиз учиш аппарати орқали ҳаводан разведка олиб борган ва Россия кучлари ҳаракатланиши ҳамда тўпланиши керак бўлган йўналишларни ишлаб чиққан.

Асирдан радиостанция олиб қўйилган, шундан сўнг у Украина ҳарбийлари томонидан сўроқ қилинган.

Украина томонининг билдиришича, асир сўроқ пайтида ушбу ҳудуддаги Россия позицияларининг жойлашуви ҳақида маълумот берган.

Шунингдек, у бошқа Россия диверсия-разведка гуруҳларининг ҳаракат йўналишлари ва ушбу йўналишдаги бўлинмаларнинг кейинги тезкор режалари ҳақида ҳам маълумот бергани айтилмоқда.