Елена Зеленская Сеулда Юн Сок Ёл билан учрашди, деб хабар қилди Украина Президенти девонхонаси. Учрашув мавзуси миналарни қидириш ва тозалаш учун ускуналар ҳақида бўлди.
Юн Сок Ёл Жанубий Корея Украина халқига фаол ёрдам беришини айтди.
Зеленская Yonhap агентлигига берган интервьюсида Корея Республикаси президентининг Украинага ташрифи эҳтимолини ҳам кўтарди. Бундай саёҳат жуда фойдали бўлишига амин эканлигини маълум қилди.
Расмий равишда Сеул Украинага ҳалокатли қурол етказиб беришдан бош тортади, бироқ ОАВ маълумотларига кўра, мамлакат Украина ҳарбийларига снарядларини Қўшма Штатлар орқали етказиши мумкин. Бир ой олдин Юн Сок Ёл Жанубий Корея Украинага ёрдамини гуманитар ва иқтисодий соҳалардан ташқари кенгайтириши мумкинлигини айтган эди.
