Трампнинг рейтинги рекорд даражада пастлади

АҚШ президенти Дональд Трампнинг рейтинги рекорд даражага тушиб кетди.

Бу Британиянинг Focaldata компанияси томонидан Financial Times (FT) учун ўтказилган сўров натижаларига кўра маълум бўлди.

Ҳисоботда америкалик сайловчиларнинг атиги учдан бир қисми унинг Оқ уйдаги фаолиятини маъқуллаётгани кўрсатилган.

Сўров натижаларига кўра, респондентларнинг атиги 33 фоизи Трампнинг ҳозирги сиёсий йўналишини қўллаб-қувватлаган, бу бир ой аввалги 35 фоиздан паст. Шу билан бирга, республикачи сайловчилар орасида уни қўллаб-қувватлаш 72 фоизга тушди, бу ФТ сўровларида яна бир рекорд даража.

Таъкидланишича, респондентларнинг аксарияти Вашингтоннинг савдо сиёсатини ва Трамп маъмурияти томонидан жорий этилган тарифларни рад этиб, уларни Америка фуқаролари учун яшаш нархининг ошишига сабаб бўлган омил сифатида кўрсатишган. Сайловчиларнинг учдан икки қисми АҚШ иқтисодиёти нотўғри йўналишда кетаётганига ишонишади, яна 57 фоизи эса Трамп маъмуриятининг сиёсати уларнинг молиявий фаровонлигига салбий таъсир кўрсатганини айтишди. Бундан ташқари, респондентларнинг 56 фоизи Канадага нисбатан сўнгги савдо тарифларидан норози бўлиб, истеъмолчилар учун нархларнинг янада ошиши эҳтимоли ҳақида хавотир билдиришган.

Financial Times (FT) шунингдек, Трампни сиёсий иттифоқчи сифатида қўллаб-қувватлашнинг камайганини таъкидлади, респондентларнинг 46 фоизи ҳозирги президент Республикачилар партияси учун бўлажак оралиқ Конгресс сайловларини қийинлаштираётганига ишонишади. Яна 47 фоизи Трамп очиқчасига қўллаб-қувватлайдиган номзодни қўллаб-қувватлашни истамаслигини айтишди.

Сўровнома 28 августдан 1 сентябргача 1914 нафар рўйхатдан ўтган сайловчилар орасида ўтказилди; хатолик чегараси тахминан 2,6 фоиз пунктни ташкил этади.