Трамп: "Эрон АҚШнинг аксарият талабларини бажаришга тайёр"

АҚШ президенти Дональд Трамп Эрон Вашингтоннинг аксарият талабларини бажаришга тайёрлигини билдирди.

Трамп бу ҳақда журналистларга маълум қилди.

"Улар бизга кўпгина бандларни беришди. Нега буни қилмасликлари керак?", деди у.

Трампнинг сўзларига кўра, Теҳрон АҚШ таклиф қилган 15 бандлик режага "асосан" қўшилади.

"Биз улардан яна бир нечта нарсани сўраймиз", деб қўшимча қилди у.

Америка раҳбари шунингдек, Эрон билан тез келишувга эришиш имкониятига ишонч билдирди.

"Менимча, Эрон билан келишув бўлади. Бу тез орада бўлиши мумкин", деб таъкидлади у.

Бироқ, Трамп келишув амалга ошмаслиги мумкинлигини тан олди.

Бундан ташқари, АҚШ президенти Эронда амалда режим ўзгариши содир бўлганини айтди.

"Мен буни режим ўзгариши деб ҳисоблардим. Ва, очиғи, улар жуда оқилона ҳаракат қилмоқдалар", деб таъкидлади у.