Тбилисидаги кучли ёмғир натижасида метро бекатини сув босди

Грузия пойтахти Тбилисидаги бир нечта туманларда кучли ёмғир ёғди ва баъзи ҳудудларда фавқулодда хизматлар юқори тайёргарлик ҳолатига келтирилди.

Кучли ёмғир кўчалар, ертўлалар ва Руставели ва Важа-Пшавела метро бекатларини сув босган.

Сабуртало туманидаги Чиковани кўчасидаги газ қувури шикастланган. Ҳодиса туфайли яқин атрофдаги бино аҳолиси эвакуация қилинган. Ҳозирда газ тармоғини тиклаш ишлари олиб борилмоқда.

Шаҳар ҳокимияти ва туман маъмуриятидаги тегишли хизматлар кучайтирилган режимда ишламоқда. Тбилис хизмат кўрсатиш гуруҳи ходимлари йўлларни тозаламоқда ва кўчалардаги бўрон оқибатларини бартараф этмоқда.

Фавқулодда вазиятларни бошқариш хизмати ходимлари ва патруль полицияси зарар кўрган ҳудудларга сафарбар қилинган.

Грузия Миллий атроф-муҳит агентлигининг маълумотларига кўра, 15 август куни эрталабгача Тбилис ва унинг атрофидаги ҳудудларда, шунингдек, Кахети ва Квемо Картлида вақти-вақти билан кучли ёмғир ёғиши кутилмоқда. Синоптиклар шунингдек, баъзи ҳудудларда момақалдироқ, дўл ва кучли шамол бўлишини башорат қилмоқда.

Кучли ёғингарчилик кичик дарёларда сув сатҳининг кўтарилишига, тоғли ва тоғолди ҳудудларида кўчкилар ва сел тошқинларига олиб келиши, шунингдек, мавжуд жараёнларни кучайтириши мумкин.

Тбилиси шаҳар ҳокимияти зарур ҳолларда аҳолига ишонч телефонига қўнғироқ қилишни тавсия қилди.