Самарқанд аэропортида пневматик қуролни олиб киришга уринган шахс ушланди. Бу ҳақда вилоят Ички ишлар бошқармаси матбуот хизмати хабар берди.
Қайд этилишича, “Самарқанд аэропорти”да “Шереметево-Самарқанд” йўналишидаги авиарейс билан учиб келган фуқаро Р.Ҳ.нинг хатти-ҳаракати божхоначиларда шубҳа уйғотган.
Ҳолислар иштирокида Р.Ҳ.га тегишли багаж сумка белгиланган тартибда кўздан кечирилганда, қиймати 5 млн сўмлик 1 дона калибри 4,5 мм бўлган пневматик тўпонча, 4 дона сиқилган ҳаво балончаси ва 89 дона ўқни тегишли рухсатномаларсиз олиб киришга урингани аниқланган.
“Жиноят кодексининг тегишли моддаларига мувофиқ, судланувчи Р.Ҳ.га базавий ҳисоблаш миқдорининг 5 баравари миқдорида – 1 500 000 сўм жарима жазоси тайинланди”, дейилади хабарда.
Шунингдек, ҳуқуқбузарлик ашёси сифатида олинган 1 дона калибри 4,5 мм бўлган пневматик тўпонча ҳамда ушбу тўпончага тегишли 4 дона сиқилган ҳаво балончалари ва 89 дона ўқлари тегишли тартибда йўқ қилинган.