Россия ҳақиқатан ҳам 50 мингдан ортиқ ҳарбийсини йўқотдими?

Bloomberg хабарига кўра, бу 2026 йил бошидан буён Россия армиясининг бир ойдаги энг катта йўқотишидир.

Россия армияси 2026 йил сентябрь ойида 50 мингдан ортиқ ҳарбийсини ҳалок бўлганлар ва ярадорлар сифатида йўқотган. Уларнинг 28 минг нафаргача қисми ҳалок бўлган бўлиши мумкин. Бундай баҳони НАТОнинг юқори лавозимли вакили Bloomberg агентлигига берган изоҳида келтирди. Унинг маълумотига кўра, Украина армиясининг шу даврдаги йўқотишлари тахминан 5 минг кишини ташкил этган.

Россия қўшинлари Украинада ҳужум ҳаракатларини давом эттирмоқда. Улар бўлинмаларини Украина дронлари, артиллерияси ва миналари зарбалари кучли бўлган ҳудудларга йўналтирмоқда. НАТО вакилининг таъкидлашича, бу шахсий таркиб орасида катта йўқотишларга олиб келмоқда.

Bloomberg 11 октябрь куни келтирган баҳога кўра, сентябрь Россия қўшинлари учун 2026 йил бошидан буён энг кўп йўқотиш қайд этилган ой бўлган. Агентлик суҳбатдоши маълумотларни ошкора муҳокама қилиш ваколатига эга бўлмагани сабабли исмини ошкор қилмаслик шарти билан гапирган.

НАТО баҳоси Украина Қуролли кучлари Бош штаби келтирган маълумотларга яқин. Украина томони сентябрь ойида Россия 46 230 нафар ҳарбийсини йўқотганини маълум қилган. Бироқ Украина статистикаси ҳалок бўлганлар, ярадорлар ва бошқа йўқотиш турларини алоҳида кўрсатмайди.

Келтирилган рақамларни мустақил равишда тасдиқлаш имкони йўқ. Москва эса ҳарбий йўқотишлар бўйича таққослаш мумкин бўлган батафсил статистикани эълон қилмайди.

Bloomberg маълумотларига кўра, Россия уруш олиб бориш учун катта маблағ сарфлашда давом этмоқда. 2026 йилда мамлакатнинг мудофаа харажатлари қарийб 17 триллион рублга етиши кутилмоқда. Бу 2025 йил охирида эълон қилинган дастлабки режадан тахминан 40 фоизга кўп.