"Реал" юлдузлари Клопп ва Моуриньо ўртасида танлов қилишди - тафсилотлар

Cadena SER журналисти Гонсало Альвареснинг сўзларига кўра, "Реал Мадрид" кийиниш хонаси янги бош мураббий сифатида Жозе Моуриньодан кўра "Ливерпуль" собиқ устози Юрген Клоппни афзал кўрмоқда.

Айни дамда клуб президенти Флорентино Перес Альваро Арбелоанинг ўрнини эгаллайдиган мутахассис қидируви билан банд. Клопп ва Моуриньо бу борада асосий номзодлар бўлиб турибди.

"Клопп Моуриньога қараганда анча оммабоп номзод. Моуриньо — портлашга тайёр турган бомбадек гап. Ўзига хос тартиб-қоида ва кучли "эго"ларга эга кийиниш хонасига у каби инсоннинг келиши дарҳол низоларга сабаб бўлишини футболчилар яхши тушунишади," — дейди журналист.

"Флорентино Клоппнинг келиши катта ҳаяжон ва кўтаринкилик уйғотишини билади. Бироқ у шуни ҳам биладики, агар Моуриньо келса, орадан уч ҳафта ўтар-ўтмас, унинг атрофидаги шов-шувлар ҳаммани аввалги муаммоларни унутишга мажбур қилади."

"Ҳар қандай мураббий ўз ишига катта меҳнат сарфлайди, лекин бунга эришиш йўллари турлича. Эҳтимол, Моуриньонинг усули Клоппникига қараганда агрессивроқдир."