Россия президенти Владимир Путиндан матбуот анжумани чоғида журналистлардан бири ОАВ унинг қизлари деб атаётган Мария Воронцова ва Катерина Тихоновани қачон ўз фарзандлари деб тан олишини сўради.
У бу саволга жавоб бермади, улар билан боғлиқ компаниялар фаолияти тўғрисидаги саволга жавобида эса уларнинг исм-шарифини тилга олмади ва «аёл» сўзи билан чекланди.
«Сиз бир аёлни, иккинчисини, уларнинг шахсий улуши, бизнесининг ҳажмини тилга олдингиз. Сиз факт келтирдингиз, аммо бу етарли эмас. Кавлаштириб кўрсангиз бу қанақа бизнес, кимга нима тегишли, ким кимга ёрдам бераётганини биласиз», — деди Путин.
Расман Путиннинг икки нафар қизи борлиги маълум, аммо у ҳеч қачон уларнинг шахсини маълум қилмаган. Россия президентининг сўзларига кўра, унинг фарзандлари фан билан машғул ва «сиёсатга аралашишмайди». У шунингдек, икки нафар набираси борлигини айтган.
Мария Воронцова ва Катерина Тихонова ҳақида нималар маълум?
Reuters ва The New Times Мария Воронцовани Владимир Путиннинг тўнғич қизи деб атаган. The New Times маълумотига кўра, у Эндокринологик илмий марказда аспирантурани тугатган. Мария Воронцова — «Новая медицинская компания» («Номеко») акциядорлик жамиятининг беш нафар эгасидан бири (20 фоиз улуш билан) ва директорлар кенгаши аъзоси.
The New Times ва Reuters’нинг таъкидлашича, Мария Воронцова нидерландиялик тадбиркор Йоррит Йост Фаассен билан турмуш қурган.
Reuters ва Bloomberg Катерина Тихоновани Владимир Путиннинг кичик қизи деб атаган. У МДУ илмий-технологик водийсини ташкил этишда қатнашаётган «Иннопрактика» фондининг раҳбари. Тихонова май ойида физика-математика фанлари номзоди бўлган. Reuters 2015 йилда Тихонова «Россия» банки акциядори Николай Шамаловнинг ўғлига турмушга чиққанини ёзган. 2018 йил бошларида Bloomberg ўз манбаларига таяниб Тихонова ва Шамалов ўртасидаги никоҳ поёнига етганлигини хабар қилган.
