Россия Федерацияси Президенти Владимир Путин Коммунарка қишлоғида коронавирусга чалинганлар даволанаётган касалхонага ташриф буюргани ҳақида хабар бергандик.
Путин касалхонага сариқ рангдаги ҳимоя кийимида кирганди. Ана шу кийим муҳокамаларга сабаб бўлди.
Ижтимоий тармоқларда Путиннинг касалхонадаги сурати тарқалгач, ўқувчилар сариқ рангни ўзгача талқин қила бошлашди. Касалхонада даволанаётган беморлардан бири Дмитрий Гаркави эса Путиннинг бошқалардан фарқли равишда ноодатий рангдаги кийимни танлаганига эътибор қаратди.
Ниҳоят, президентнинг матбуот котиби Дмитрий Песков бу масалага шундай нуқта қўйди: "Президентга шу рангдаги кийимни беришди. Бу ҳеч қандай маънони англатмайди”.
