Прокуратура ходимларидан бир гуруҳига орден ва медаллар топширилди

Бугун, 8 январь куни Ўзбекистон Республикаси прокуратура органлари ходимлари куни муносабати билан тантанали тадбир ташкил этилди.

Тадбирда Ўзбекистон Республикаси Президентининг матбуот котиби Шерзод Асадов Давлатимиз раҳбари Шавкат Мирзиёевнинг прокуратура органлари ходимлари ва фахрийларига йўллаган байрам табригини ўқиб эшиттирди.

Қутловда сўнгги йилларда прокуратура органлари фаолиятини ислоҳ қилиш борасида амалга оширилган ишлар натижасида тизимнинг халққа янада яқинлашгани, инсон қадри, ҳуқуқ ва эркинликлари ҳамда қонуний манфаатларни бевосита жойларда таъминлайдиган самарали институтга айлангани алоҳида таъкидланди.

Эслатиб ўтамиз, куни кеча Ўзбекистон Республикаси Президентининг фармонига мувофиқ прокуратура органлари ходимларидан бир гуруҳи орден ва медаллар билан тақдирланган эди. Бугунги тантанали тадбирда Президент Администрацияси раҳбарининг ўринбосари Нодира Ҳакимова ушбу юксак давлат мукофотларини топширди.