Оскар-2026: «Жанг ортидан жанг» энг яхши фильм бўлди

15 март куни АҚШнинг Лос Анжелес шаҳрида Америка киноакадемиясининг 98-«Оскар» мукофотларини топшириш маросими бўлиб ўтди.

Энг яхши фильм деб режиссёр Пол Томас Андерсоннинг «Жанг ортидан жанг» фильми топилди. Пол Томас Андерсон ушбу фильми учун иккита «Оскар»ни қўлга киритди — энг яхши режиссёр ва энг яхши мослаштирилган сценарий муаллифи сифатида.

«Энг яхши оригинал сценарий» номинациясида эса Райан Куглер («Гуноҳкорлар») ғолиб бўлди. Ушбу хоррор-триллер 16 та номинация билан номзодлар сони бўйича етакчи бўлди. У «Титаник», «Ла-Ла Ленд» ва «Ева ҳақида ҳаммаси» фильмларини ортда қолдирди.

«Жанг ортидан жанг» фильмидаги роли учун Шон Пенн энг яхши иккинчи даражали эркак актёр деб топилди. Шунингдек, фильм «энг яхши кастинг» номинациясида ҳам «Оскар» олди — бу янги жорий этилган номинация ҳисобланади.

«Энг яхши иккинчи даражали аёл актриса» номинациясида «Қуроллар» фильмидаги роли учун Эми Мэдиган мукофотга сазовор бўлди.

«Энг яхши эркак актёр» мукофоти «Гуноҳкорлар» фильмидаги роли учун Майкл Б. Жорданга берилди. «Энг яхши аёл актриса» деб эса «Хамнет» фильмидаги роли учун Жесси Бакли тан олинди.

«Кей-поп иблис овчилари» анимацион фильми иккита «Оскар»га сазовор бўлди — энг яхши тўлиқ метражли анимацион фильм ва энг яхши қўшиқ («Golden») номинацияларида.

«Энг яхши ҳужжатли фильм» номинациясида «Жаноб Ҳечким Путинга қарши» фильми ғолиб бўлди. У америкалик режиссёр Дэвид Боренштейн ва Уралнинг Карабаш шаҳридан видеограф Павел Таланкин томонидан яратилган.

«Энг яхши хорижий фильм» номинациясида мукофот норвегиялик кинематографистлар яратган «Сентиментал қиймат» фильмига берилди.

Техник номинацияларда «Франкенштейн» фильми бир нечта мукофотни қўлга киритди — энг яхши костюмлар, энг яхши грим ва соч турмаклари, шунингдек энг яхши постановкачи рассом иши учун.

Энг яхши визуал эффектлар учун мукофот «Аватар: Олов ва кул» фильмига, энг яхши овоз учун эса «Формула-1» фильмига топширилди.