Неймар Бразилия терма жамоасидаги фаолиятини якунлаганига ишора қилди

«Сантос» ҳужумчиси Неймар Бразилия терма жамоасидаги фаолиятини якунлаётганига ишора қилди.

ЖЧ-2026 1/8 финалида Норвегияга қарши кечган ва 1:2 ҳисобидаги мағлубият билан якунланган баҳсдан сўнг бразилиялик футболчи ҳиссиётларга бой фикр билдирди. Неймар учрашувни захирадан бошлаб, иккинчи бўлимга қўшиб берилган вақтда пенальтидан гол урди.

«Мен бор кучим билан ҳаракат қилдим ва курашдим. Энди ҳаммаси тугади. Мен бу ерда бошлаганман, шу ерда ҳам якунлаяпман», — деди Неймар Globo нашрига.

Ушбу мағлубиятдан кейин Бразилия терма жамоаси ЖЧ-2026 билан хайрлашди.

Неймар Бразилия миллий жамоаси тарихидаги энг яхши тўпурар ҳисобланади. У 2010 йилдан буён терма жамоа сафида 130 та учрашувда майдонга тушиб, 80 та гол урган ва 59 та голли узатмага муаллифлик қилган.