Марсга жўнатилган ракета қизил сайёранинг биринчи расмларини Ерга жўнатди

Хитойнинг Tianwen-1 номли космик кемаси Марс сайёрасининг илк суратларини Ерга жўнатди. Бу ҳақда Хитой миллий космик агентлиги хабар берган.

Ушбу ракета ўтган йилнинг июль ойида космосга учирилган бўлиб, у шу йили Марсга қўниб, уни ўрганиши режалаштирилган. Ракета тахминан 10 февраль куни Марс орбитасига кириши кутилмоқда.

6 февраль куни Хитой миллий космик бошқармаси томонидан эълон қилинган оқ-қора суратларда Марснинг геологик хусусиятлари намоён бўлди. Жумладан, суратларда Счиапарелли номли кратер ва Валлес Маринерис номли катта ҳудудни эгаллаган дараларни кузатиш мумкин.

Мазкур суратлар Марсдан тахминан 2,2 миллион километр масофа узоқликда олинган, дея хабар беради Хитой миллий космик бошқармаси. Айни пайтда космик кема Марс сайёрасидан 1,1 миллион километр узоқликда турибди.

Совуқ уруш даврида Америка Қўшма Штатлари ва Совет Иттифоқи космос соҳасида етакчилик қиларди. Хитой бу ҳолатни кўриб ўзининг космик дастурига миллиардлаб долларларни тикди. Хитой 2003 йилда биринчи марта ўз фазогирини космосга учирди. Айни пайтда Осиёнинг энг кучли давлатларидан бири бўлган Хитой сўнгги ўн йил ичида ҳам космос бўйича улкан ютуқларга эришди.