Мадуронинг Венесуэлани тарк этиши учун бир ҳафта вақти бор

Трамп Мадурога Венесуэлани тарк этиши учун бир ҳафта вақт берган, деб хабар бермоқда Reuters.

Венесуэла президенти Николас Мадуро ноябр ойининг охирида АҚШ президенти Доналд Трамп билан телефон орқали суҳбатлашганидан сўнг, Вашингтон томонидан хавфсизлик кафолатлари билан мамлакатни тарк этиш имкониятларини деярли йўқотди, деб хабар беради агентлик ўз манбаларига таяниб.

Президентлар 21 ноябр куни суҳбатлашган, бу вақтда АҚШ Венесуэлага босимни кучайтираётган ва Кариб денгизига дунёдаги энг йирик авиаташувчи USS Gerald Ford бошчилигидаги ҳарбий эскадронни юборган эди.

"Қўшма Штатлар ва Венесуэла етакчиларининг суҳбати тахминан 15 дақиқа давом этган. Мадуро Трампга агар ўзи ва оиласига қарши санкциялар олиб ташланса ҳамда уларга ҳуқуқий амнистия берилса, истеъфога чиқиб, Венесуэлани тарк этишга тайёрлигини билдирган. Шунингдек, у мамлакат раҳбариятидаги тахминан 100 нафар шахсга ҳам амнистия беришни сўраган", дея ёзмоқда Reuters манбаларига таяниб.

Агентлик суҳбатдошларининг айтишича, Трамп бу шартларга рози бўлмаган ва Мадурога мамлакатни тарк этиши учун бир ҳафта берган. Бу муддат 28 ноябрда тугаган, шундан сўнг Трамп Венесуэла устидаги ҳаво макони ёпилганини эълон қилган.

Reuters манбаларига кўра, Мадуро маъмурияти Трамп билан яна бир телефон суҳбати ўтказишни сўраган, бироқ ҳозирча келишувга эришилмаган.

АҚШ Венесуэла ва унинг президентини наркотрафикка кўз юмишда айблаб келади ҳамда наркотик ташиётгани иддао қилинган кемаларга мунтазам равишда зарбалар беради. Венесуэла бу айбловларни рад этади ва Вашингтоннинг босимини Мадурони ағдаришга қаратилган уриниш сифатида кўради.