Қайта тикланадиган манбалар 2030 йилга келиб Литвада электр энергияси ишлаб чиқаришнинг ягона манбаига айланиши керак.
Бу сиёсат республиканинг энергетик мустақиллиги бўйича миллий стратегияда ўз ифодасини топган.
“Мақсад - Литванинг энергетика сектори 100% иқлим нейтрал бўлишини таъминлаш. 2030 йилга келиб Литвада ишлаб чиқариладиган ва истеъмол қилинадиган барча электр энергияси қайта тикланадиган манбалардан ишлаб чиқарилиши керак”, — дейилади ҳужжатда.
Ҳужжат Сейм (парламент) ялпи мажлисида қабул қилинди. 74 нафар депутат уни қўллаб-қувватлади, 26 нафари бетараф, 7 нафари қарши чиқди.
Энергетика вазири Дайниус Крейвис аввалроқ Литванинг 2050 йилгача бўлган энергетика мустақиллиги стратегиясида кўрсатилган вазифаларни амалга ошириш учун 150 миллиард евро керак бўлишини таъкидлаган эди.