Американинг Мичиган штатидаги Фармингтон-Хиллс шаҳрида шифокорлар тиббиёт ходимига тўғри муносабат қилмай, унинг ўлимига сабаб бўлишди. Бу ҳақда WJBK телеканалининг веб-сайтида хабар берилди.
Дебора Гейтвуд, 63 ёшда, лаборатория диагностикаси шифокори бўлиб ишлаган ва тестларни ўтказиш учун қон тўплашга масъул бўлган. Март ойида у ўзида коронавирус аломатларини сезди ва ёрдам сўраб ҳамкасбларига мурожаат қилди. Шифокорлар унинг коронавирусга чалинганини тахмин қилишди, аммо текширув ўтказишмади ва ўз-ўзини изоляция қилиш учун уйига жўнатишди.
Гейтвуднинг қизи Кайланинг таъкидлашича, шундан сўнг онаси касалхонага яна уч марта бориб, йўтал ва иситма кучайиб бораётганидан шикоят қилган. Бироқ унда CОВИД-19 текшируви ўтказиш ўрнига йўталга қарши дори беришган ва уй шароитида даволанишни сўрашган. “Онам иш жойида вирус юқтирди, аммо ҳамкасблари унга ёрдам беришмади. Бу жуда ёмон ҳолат», деди Кайла.
Гейтвуднинг аҳволи тезда ёмонлашди. Уйда ҳушини йўқотганидан кейин касалхонага ётқизилди. Касалхонада унга икки томонлама пневмония ташхиси қўйилган. Бир неча кундан кейин у вафот этди. "Қандай қилиб онамнинг аҳволи оғирлашганида шунчаки йўталга қарши таблетка бериб, уй шароитида даволанишни буюриш мумкин?" — дея ғазабланади қизи.
Аввалроқ, шифокорлар Американинг Мичиган университетидаги талабани CОВИД-19 учун текширишдан бир неча марта бош тортган ва унинг ўлимига сабаб бўлгани ҳақида хабар берилган эди. Йигитнинг аҳволи оғирлашгандан кейингина у касалхонага ётқизилган ва унда коронавирус инфекцияси аниқланган.
