Конор Макгрегор Ислам Махачевга бокс қоидалари бўйича жанг таклиф қилди

UFC’нинг ярим ўрта вазн тоифасидаги амалдаги чемпиони Ислам Махачев ташкилотнинг собиқ икки вазн тоифасидаги чемпиони Конор Макгрегор унга бокс қоидалари бўйича жанг ўтказишни таклиф қилганини маълум қилди.

Доғистонлик жангчи Матч TV телеканалига берган интервьюсида воқеа яқинда Нью-Йоркда ташкил этилган бокс турнири вақтида содир бўлганини айтди.

«Ўша ерда Макгрегорга видеоқўнғироқ қилишди. У менга бокс қоидалари бўйича жанг ўтказишни таклиф қилди. Мен рози бўлдим ва бу масала бўйича UFC раҳбари Дана Уайтга мурожаат қилишини айтдим. Ўртамизда кичик оғзаки тортишув ҳам бўлди», — деди Махачев.

Эслатиб ўтамиз, Макгрегор июнь ойида ҳам Махачевга қарши октагонга чиқиш истагини билдирган эди. Бироқ 12 июль куни ирландиялик жангчи беш йиллик танаффусдан кейин UFC’даги илк жангини америкалик Макс Холлоуэйга қарши ўтказди. Макгрегор биринчи раунддаёқ жароҳат олди. Кейинчалик у тиззасидан операция қилинди ва тахминан бир йилга сафдан чиқди.

Фаолияти давомида UFC’нинг ярим енгил ва енгил вазн тоифаларида чемпионлик камарини қўлга киритган Макгрегор MMA’да 22 та ғалаба ва 7 та мағлубият қайд этган.

Ислам Махачев эса сўнгги жангини 16 август куни Филадельфияда ўтказилган UFC 330 турнирида ирландиялик Иэн Гэррига қарши ўтказди. Чемпионлик баҳсида Махачев ҳакамларнинг якдил қарори билан ғалаба қозонди.

Бу унинг UFC’даги кетма-кет 17-ғалабаси бўлиб, мазкур натижа орқали Махачев ташкилот рекордини ўрнатди. Унинг профессионал MMA’даги умумий кўрсаткичи 29 та ғалаба ва битта мағлубиятдан иборат.