Кирилл Румянцев ўзи ва оиласига таҳдидлар бўлаётганини айтди

"Яблоко" партияси Саратов вилояти бўлими раиси ўринбосари ўзига ўлдириш билан таҳдид қилинаётгани ва номзодини сайловдан олиш талаб этилаётганини айтди.
​
"Яблоко" партиясининг Саратов вилояти бўлими раиси ўринбосари ва Балашов округи бўйича Давлат думасига номзод Кирилл Румянцев ўзи ва оиласига "сиёсий позицияси ҳамда партияга мансублиги" сабабли таҳдидлар бўлаётганини маълум қилди.

​"Биринчи қўнғироқ 6 август пайшанба куни бўлди. Номаълум шахс мендан Давлат думасига сайловлардан номзодимни олишни қатъий сўради. Шундан сўнг шахсан менга ва оиламга қаратилган бир қатор таҳдидлар янгради. Шунингдек, у менга умуман алоқам бўлмаган тақиқланган моддаларни ташлаб қўйишлари мумкинлигини айтди", — деди Румянцев.

​Кейинчалик Telegram'да Игор исмли шахс унга ёза бошлаган. У Румянцевни уйи атрофида кузатганини таъкидлаган. Эълон қилинган скриншотда Игор Румянцевга "бошини ёриш", ўлдириш ва "онангга салом айтиб қўйиш" билан таҳдид қилганини кўриш мумкин.

​Румянцев полицияга ариза берди.

​Июл охирида Россия Марказий сайлов комиссияси "Яблоко" партияси рўйхатини кузги Давлат думаси сайловларида иштирок этиш учун рўйхатдан ўтказган эди. Ушбу сайловларга "Яблоко" "Тинчлик ва озодлик учун! Қўрқувсиз ҳаёт учун!" шиори билан бормоқда ва бюллетенда урушга қарши позициядаги ягона партия бўлади. Барча тизимли сиёсий кучлар вакиллари "Яблоко"ни урушга бўлган муносабати учун танқид қилишга ва суд орқали партияни сайловдан олишни талаб қилишга улгуришди.