Ким Чен Ин оммавий маросимда Шимолий Корея бош вазири ўринбосарини ишдан ҳайдади

Шимолий Корея етакчиси Ким Чен Ин Рёнсонс машинасозлик мажмуасини реконструкция қилиш ва модернизация қилишнинг биринчи босқичи якунланганига бағишланган маросимда Бош вазир ўринбосари Янг Син Хони ишдан бўшатди.

Бу ҳақда Корея Марказий ахборот агентлиги хабар берди.

Тадбирда нутқ сўзлаган Ким Чен Иннинг сўзларига кўра, модернизациянинг биринчи босқичи "масъулиятсиз, қўпол ва қобилиятсиз раҳбарлар туфайли кераксиз сунъий тартибсизликларга дуч келди, бу эса қийинчиликлар ва катта иқтисодий зарарларга олиб келди".

У баъзи раҳбарлар "умуман мамлакатда саноатни соддалаштириш ва техник қайта қуришга тайёр эмасликларини" таъкидлади ва "мағлубиятга, масъулиятсизликка ва пассивликка ўрганиб қолганларга таянишни бас қилишга" чақирди. Ушбу сўзлардан сўнг Ким Чен Ин Бош вазир ўринбосари Янг Син Хони ўша ернинг ўзида ишдан бўшатди ва уни "аравага боғланган эчки" билан таққослади. Бироқ, мамлакат раҳбари Бош вазир ўринбосари партияга қарши ҳаракатларни содир этганига ишонмаслигини; аксинча, бу тасодифий кадрлар хатоси эканлигини айтди.

Корея Марказий ахборот агентлиги хабарига кўра, маросим иштирокчилари Ким Чен Инни тўлиқ қўллаб-қувватлашларини билдиришди. Шундан сўнг, Бош вазир Пак Тхэ Сонг қурилишнинг якунланишини нишонлаш учун қизил лентани кесди ва мамлакат раҳбари Рёнсонс машинасозлик мажмуасини кўздан кечирди. У корхона модернизация йўлида катта қадам ташлаганини ва шу билан мустақил иқтисодиёт пойдеворини мустаҳкамлаганини таъкидлади.