ЖССТ Конгода Эбола вируси тарқалишининг тезлашиши ҳақида огоҳлантирди

Конго Демократик Республикасининг (КДР) айрим кластерларида янги Эбола ҳолатлари сони сўнгги ҳафтада икки бараварга ошди.

Бу ҳақда Жаҳон соғлиқни сақлаш ташкилоти (ЖССТ) бош директори Тедрос Аданом Гебрейесус маълум қилди.

"Эпидемия биз чораларимизни кучайтиришдан кўра тезроқ тарқалиб бормоқда, айрим кластерларда янги ҳолатлар сони сўнгги ҳафтада икки бараварга ошди", деб ёзган у КДР пойтахти Киншасага ташрифидан сўнг ижтимоий медиа платформасида.

ЖССТ директорининг сўзларига кўра, соғлиқни сақлаш ва гуманитар соҳа вакиллари шошилинч ва кенг кўламли чоралар кўриш зарурлиги ҳақида келишиб олдилар. Бунга тиббий ёрдамга киришни кенгайтириш, эпидемиологик назоратни кучайтириш, тиббиёт ходимларини ҳимоя қилиш ва хавфсиз дафн маросимларини ташкил қилиш киради.

Тедрос Аданом Гебрейесус маҳаллий аҳолининг ишончи ва уларнинг чоралар кўришдаги иштироки эпидемияни жиловлашда муҳим аҳамиятга эга эканлигини таъкидлади.

Шуни таъкидлаш керакки, 17-Ебола эпидемияси 15 май куни КДР шарқида бошланган. 1 август куни ЖССТ уни мамлакат тарихидаги энг йирик деб эълон қилди. Сўнгги маълумотларга кўра, юқтирганлар сони 3700 дан ошди, 1600 дан ортиқ киши вафот этди.