Жесси Марш: «Ўзбекистон осонликча имконият бериб қўядиган жамоа эмас»

Канада терма жамоаси бош мураббийи Жесси Марш Ўзбекистонга қарши ўйиндан кейин ўз фикрларини билдириб ўтди.

— Ўйин ҳақидаги умумий фикрларингиз қандай?

— Ҳа, умуман олганда, яхши ўйин кўрсатдик деб ўйлайман. Жамоамизда кўплаб яхши индивидуал чиқишлар бўлди. Ўйиндан кейин ҳам гаплашдик: агар айрим жиҳатларни янада яхшиласак, учрашувни янада кўпроқ назорат қила оламиз. Аммо Ўзбекистон осонликча имконият бериб қўядиган жамоа эмас. Улар ҳимояда жуда ишончли ҳаракат қилишади. Биз иккита гол урдик, яна кўпроғини ҳам киритишимиз мумкин эди. Қарши ҳужумларда жуда хавфли кўриндик ва кўплаб футболчилар яхши ўйин намойиш этди.

Кўп йигитларнинг деярли 100 фоиз тайёр ҳолатга келгани, жисмоний жиҳатдан яхши кўрингани қувонарли. Шунинг учун натижадан мамнунман. Бу биз учун яхши биринчи учрашув бўлди. Энди бу ўйиндан хулоса чиқариб, кейинги баҳсда янада кучлироқ бўлишимиз керак.

— Кўплаб қоидабузарликлар бўлган ва жароҳатдан қайтаётган футболчилар иштирок этган шундай оғир шароитда мураббий сифатида ўзингизни қандай ҳис қилдингиз? Хавотир бор эдими?

— Йўқ, йўқ. Майдон аслида яхши ҳолатда эди. Ҳа, сирпаниш ва кескин тўп олиб қўйишлар учун шароит бор эди, лекин умуман олганда майдон яхши ҳолатда. Баъзи шундай учрашувларда футболчилар жароҳат олишдан қўрқиб, интенсивликни пасайтириб қўйишади.

Биз эса, жароҳатлар билан боғлиқ вазият қандай бўлишидан қатъи назар, диққатни йўқотмаслигимиз кераклигини таъкидладик. Ҳар бир кундан унумли фойдаланишимиз, олдинга ҳаракат қилишимиз, мақсадларимизга содиқ қолишимиз ва ўсиш ҳамда ривожланишда давом этишимиз лозим. Шунингдек, келажакдаги ўйинларга пухта тайёргарлик кўришимиз керак.

Менимча, йигитларнинг руҳий ҳолати бугун мутлақо идеал даражада бўлди. Бу эса яхши ўйин кўрсатишимиз ва муносиб ғалабага эришишимизга ёрдам берди.