Жефф Безос - СИ келажакда уч кунлик иш ҳафтасига имкон беради

Amazon асосчиси Жефф Безоснинг фикрича, сунъий интеллект (SI) иқтисодиёт самарадорлигини сезиларли ошириб, одамларга ҳафтасига атиги уч кун ишлаш ва оиласини битта даромад ҳисобидан таъминлаш имконини бериши мумкин. У бу фикрни Fox News телеканалига берган интервьюсида билдирди.

Безоснинг таъкидлашича, сунъий интеллект ёрдамида корхоналар камроқ вақт ва ресурс сарфлаб, кўпроқ маҳсулот ишлаб чиқариши ёки хизмат кўрсатиши мумкин. Натижада айрим ходимлар оиласини боқиш учун ҳафтасига беш кун ишлаши ёки бир нечта ишда банд бўлишига эҳтиёж сезмаслиги мумкин.

Унинг фикрича, икки киши ишлайдиган оилаларда ҳам келажакда бир кишининг даромади оилани таъминлаш учун етарли бўлиши мумкин. Бундай шароитда иккинчи оила аъзоси ишлашни давом эттириш ёки меҳнат фаолиятидан танаффус олишни ўзи танлайди.

Безос сунъий интеллект кўплаб иш ўринларини йўқ қилиши ҳақидаги прогнозларга қўшилмаслигини билдирди. Унинг тахминича, SI самарадорликни ошириши натижасида одамлар камроқ ишлашни танлаши, бу эса айрим соҳаларда ишчи кучи танқислигини келтириб чиқариши мумкин.

Унинг қарашлари сунъий интеллект иқтисодиётга фақат иш ўринларини қисқартириш орқали эмас, балки меҳнат унумдорлигини ошириш орқали ҳам таъсир кўрсатиши мумкин деган фикрга асосланади.

Fox News бошловчиси Брет Баер интервьюда компанияда ўн минглаб корпоратив лавозимлар қисқартирилганини эслатди.

Безос буни пандемия даврида Amazon ходимлари сонининг тез суръатларда оширилгани билан изоҳлади. Унинг фикрича, компаниянинг ўша даврдаги кенгайиши бугунги вазиятни тушунишда муҳим омил ҳисобланади.

Тадбиркор бу ўзгаришлар қачон юз беришини айтмади. Шунингдек, сунъий интеллект туфайли ортадиган иқтисодий самарадорлик ходимларнинг даромадига қандай тақсимланиши ёки иш берувчилар қисқароқ иш ҳафтасини қандай жорий этиши ҳақида аниқ механизм таклиф қилмади.

Шу сабабли унинг баёнотини амалга оширилиши тасдиқланган режа эмас, балки келажак ҳақидаги тахмин сифатида қабул қилиш керак.