Истанбулда сайёҳлар ўлими: 11 киши қўлга олинди

Истанбулда немис сайёҳлари оиласининг ўлими бўйича қўлга олинганлар сони душанба куни 11 кишига етди, деб хабар бермоқда IHA агентлиги.

Бир кун аввал Истанбул полицияси аввалроқ уч нафар мижоз вафот этган Harbour Suites меҳмонхонасини текширув учун ёпган эди.

"Божеклар оиласи аъзоларининг ўлими бўйича қўлга олинганлар сони 11 нафарга етди, улар орасида меҳмонхонада дезинфекция ўтказган компания ходими ва меҳмонхонанинг икки ходими бор," - дейилади агентлик хабарида.

Шанба куни Истанбул марказидаги Harbour Suites меҳмонхонасидан яна икки нафар хорижлик сайёҳ касалхонага ётқизилди, уларнинг ҳаётига ҳозир ҳеч нарса хавф солмаяпти. Эртаси куни ушбу сайёҳларга ҳамроҳлик қилган яна бир мижоз касалхонага мурожаат қилди, деди Истанбул вилояти соғлиқни сақлаш департаменти директори Абдуллоҳ Гунер.

Оммавий ахборот воситалари меҳмонларнинг аҳволи ёмонлашишига сувли кулер ёки ўтказилган дезинфекция оқибатлари сабаб бўлган бўлиши мумкинлигини тахмин қилишди. Меҳмонхона ўз ошхонасига эга эмас, меҳмонларга фақат сув берилади. Расмий даражада бу версиялар ҳали тасдиқланмаган.

Германиядан келган сайёҳлар оиласи 12 ноябрь куни қусиш ва ўзини ёмон ҳис қилиш шикояти билан меҳмонхонадан шифохонага олиб келинган. Ўша куни улар қўйиб юборилган, бироқ 13 ноябрга ўтар кечаси уч ва олти ёшли болаларнинг аҳволи кескин ёмонлашган ва оила яна касалхонага ётқизилган. Болалар 13 ноябрь куни вафот этган, эртаси куни уларнинг онаси вафот этган. Отам интенсив терапия бўлимига ётқизилган, унинг аҳволи оғир деб баҳоланмоқда.