Исроил яна камида уч ҳафта уруш олиб боришни режалаштирмоқда

Исроил камида яна уч ҳафта давомида ҳарбий ҳаракатларни давом эттириш учун батафсил режаларга эга. Мамлакат армияси ҳозир ҳам Эрон ҳудудидаги объектларга зарбалар беришни давом эттирмоқда.

Бу ҳақда Исроил армияси вакили, подполковник Надав Шошани журналистларга маълум қилди, деб хабар берди Reuters. Агентлик таъкидлашича, Яқин Шарқдаги уруш учинчи ҳафтасига кирмоқда ва яқин орада тугаш аломатлари кўринмаяпти.

Шу билан бирга, Ҳурмуз бўғози, орқали жаҳондаги нефть ва суюлтирилган табиий газ етказиб беришнинг тахминан 20 фоизи ўтади, амалда ёпилган. Бу эса нефть нархларининг ўсишига ва глобал инфляциянинг янги босқичи бошланиши хавотирларига сабаб бўлмоқда.

АҚШ президенти Дональд Трамп якшанба куни бўғозда кемалар ҳаракатини тиклаш учун халқаро коалиция тузишга чақирди. У шунингдек, агар иттифоқчилар Вашингтонни қўллаб-қувватламаса, **НАТО**ни «жуда ёмон келажак» кутаётгани ҳақида огоҳлантирди.

Трампнинг бу чақириғи эҳтиёткорлик билан қабул қилинди: иттифоқчилар маршрутни очиш бўйича дипломатик саъй-ҳаракатларни қўллаб-қувватлашини билдирган, аммо эҳтимолий ҳарбий ҳаракатларга нисбатан жуда эҳтиёткор муносабатда эканини кўрсатган.

Шошанининг таъкидлашича, Исроилнинг асосий мақсади — Эроннинг мамлакатга таҳдид солиш қобилиятини «заифлаштириш». Исроил ҳарбийлари айтишича, Тель-Авивда ҳали ҳам Эрон ҳудудида зарба бериш учун «минглаб нишонлар» мавжуд.