Иркутск вилоятида ўлат тарқалдими? Ҳозирча маълум бўлган маълумотлар

Иркутскдаги Ўлатга қарши кураш институти ходими, 28 ёшли Дарья Шипилованинг 2 октябрь куни вафот этгани маҳаллий аҳоли орасида хавотир уйғотди. Россия истеъмолчилар ҳуқуқларини ҳимоя қилиш ва инсон фаровонлигини назорат қилиш федерал хизмати (Роспотребнадзор) маълум қилишича, марҳумага ўпка яллиғланиши ташхиси қўйилган, бироқ касаллик сабаби ҳозирча аниқланмаган.

Россия президенти матбуот котиби Дмитрий Песков эса аҳолини турли миш-мишларга ишонмасликка чақирган.

Дарья Шипилова Сибирдаги ўлатнинг табиий ўчоқларидан олинган Yersinia pestis бактериясининг антибактериал препаратларга сезувчанлигини ўрганиш бўйича тадқиқотларда иштирок этган. Бундай изланишлар инфекция қўзғатувчисига қайси антибиотиклар самарали таъсир қилишини аниқлашга хизмат қилади. Мазкур тадқиқот 2026 йил 31 март куни «Табиий ўчоқли ва зооноз инфекциялар» симпозиумида тақдим этилган.

Yersinia pestis — ўлат касаллигини келтириб чиқарувчи бактерия. Инсон инфекцияланган бургалар чақиши, зарарланган тўқималар ёки биологик суюқликлар билан алоқа қилиш, шунингдек, ўпка ўлати билан касалланган бемор ажратадиган ҳаво-томчи заррачаларини нафас орқали қабул қилиш натижасида юқтириши мумкин. Ўз вақтида даволанмаса, касаллик оғир кечиши ва тез ривожланиши мумкин. Бироқ антибиотиклар билан эрта бошланган даволаш беморни сақлаб қолиш имконини беради.

Шипилованинг вафотидан сўнг Иркутск вилояти губернатори Игорь Кобзевнинг Telegram-каналидаги бошқа мавзуларга бағишланган хабарлар остида ҳам аҳоли томонидан хавотирли саволлар қолдирилган. Айрим фойдаланувчилар мактабларда болалар ва ўқитувчиларнинг хавфсизлиги юзасидан савол берган, бошқалар эса расмий маълумотлар етарли эмаслигидан норозилик билдирган.

Айни пайтда эпидемиолог Михаил Фаворов Иркутск вилоятида ўлат эпидемияси юзага келиш эҳтимолини жуда паст деб баҳолаган. Унинг фикрича, лабораториядаги пробирканинг синиши назарий жиҳатдан мумкин бўлган ҳолат, аммо бунинг ўзи инфекцион аэрозол ҳосил бўлиб, унинг нафас орқали юқишига олиб келиши шарт эмас.

Шу тариқа, ҳозирча Иркутск вилоятида ўлат касаллиги тарқалаётганини тасдиқловчи расмий маълумотлар келтирилмаган. Маҳаллий аҳоли орасидаги хавотир асосан тадқиқотчи ходимнинг ўлими ва бу ҳолат юзасидан расмий маълумотларнинг чекланганлиги билан боғлиқ.