Греция россиялик ташвиқотчиларни мамлакатдан ҳайдаб чиқарди

Кремль ташвиқотини тарқатувчи "РИА Новости" агентлиги Грециядаги мухбирлиги ёпилганини маълум қилди. Агентлик Греция Ташқи ишлар вазирлиги унинг бош мухбири Геннадий Мелникнинг аккредитациясини узайтиришдан бош тортгани учун улар мамлакатда ишлашни давом эттира олмаслигини қайд этди.

"Ўтган йили аккредитация муддати кечикиш билан узайтирилган эди, бу йил эса Халқаро жамоатчилик билан алоқалар бўлими ходими бизга ижобий жавоб бўлмаслигини маълум қилди. У қарор тафсилотларини айтиб бера олмади ёки унинг сабабларини тушунтира олмади", — дея хабар берди "РИА Новости" ва улар содир бўлаётган воқеаларни "сўз эркинлиги ва демократия тамойилларини қўпол равишда бузиш" деб ҳисоблашларини қўшимча қилди.

Агентлик бюроси 2004 йилги Олимпия ўйинлари арафасида Афинада очилган. Шу билан бирга, сўнгги уч йил давомида Греция ҳукумати "РИА Новости" фаолиятини чеклаб қўйган ва унга айрим тадбирларда, жумладан, халқаро тадбирларда қатнашишга рухсат бермаган. Россия армияси Украинага бостириб кирганидан кейин агентлик мухбирига бир йилдан ортиқ вақт давомида Греция Ташқи ишлар вазирлиги матбуот анжуманларида қатнашиш тақиқланган эди.

Шунингдек, 2022 йилда Греция "РИА Новости", "Спутник" ва "РТ"ни ўз ичига олган Russia Today медиа гуруҳининг ресурсларини блоклади. Ўтган йилнинг декабрь ойида мамлакат маҳаллий қонунчиликни бузгани учун Россия агентлигининг Телеграм каналини блоклашни бошлаган.

Европа Иттифоқи РИА Новостига қарши санксияларни 2024 йил июнь ойида жорий қилган эди. Агентлик билан бир қаторда "Известия", "Российская газета" ва Россияга алоқадор, Чехияда жойлашган "Европа овози" портали ҳам чекловларга дучор бўлган. Аввалроқ Европа Иттифоқи Спутник, РТ, Царград, Спас, МИА Россия Сегодня, Oriental Review, New Eastern Outlook ва Катехон контентини трансляция қилиш ва тарқатишни тақиқлаган эди. Худди шу чоралар RT English, RT UK, RT Germany, RT France, RT Spanish учун ҳам қўлланилган. НТВ, “Россия 1”, “Биринчи канал” ва “Рен-ТВ” ҳам Европадаги трансляция лицензияларидан маҳрум бўлди.

Жорий йилнинг февраль ойида қабул қилинган Россияга қарши 16-санкция пакети доирасида ЕИ яна саккизта рус оммавий ахборот воситаларини тақиқлади. Хусусан, чекловлар қуйидаги нашрларга таъсир қилди: EADaily, Лента, News Front, RuBaltic, "Южний фронт", "Стратегик маданият фонди" ва "Красная Звезда".