Франция 15 декабрдан карантин ўрнига комендантлик соатини жорий қилди

Францияда 15 декабрдан коронавирус тарқалишига қарши киритилган карантин бекор қилиниб, чекловларни енгиллаштиришнинг янги босқичига ўтилади. Бироқ коронавирусга чалиниш ҳолатлари кўпаяётгани сабабли янги чоралар аввал тахмин қилингандан қатъийроқ бўлади. Жумладан, мамлакат бўйлаб соат 20дан 6гача комендантлик соати амал қилади.

Франция бош вазири Жан Кастекснинг таъкидлашича, комендантлик соатига риоя қилинишини 100 мингдан кўпроқ полициячи назорат қилади. Фақат Рождество кечаси бундан истисно бўлади, яъни 24 декабрдан 25 декабрга ўтар кечаси комендантлик соати амал қилмайди. Бироқ Янги йил кечаси бундан истисно бўлмайди. 

Шунингдек, мамлакат ичида ҳаракатланишга рухсат берилади. Бироқ музейлар, кинотеатрлар, театрлар чекловлар енгиллаштирилишининг кейинги босқичи бошланиши керак бўлган 7 январгача ёпиқ қолади.  

Карантин вақтида уйдан чиқиш учун талаб қилинган ҳужжат 15 декабрдан керак бўлмайди. Шу билан бирга, комендантлик соати амал қилган вақтда жиддий оилавий сабаблар, тиббий зарурат ва касбий фаолият билан боғлиқ истисно ҳолатларидан ташқари, барча уйида қолиши керак бўлади.     

Францияда октябр охиридан такрорий карантин амал қилиб келганди. Унинг доирасида бар, ресторан, маданий объектлар ёпиқ қолган. Ноябрда карантин чекловларини енгиллаштириш бошланиб, кийим-кечак ва китоб дўконлари, гўзаллик салонлари ва сартарошхоналар очилган.    

Айни вақтда Францияда коронавирусга чалинганлар сони 2,4 млнга яқинни ташкил қилмоқда, инфекциядан 56 мингдан кўпроқ одам вафот этган. Сўнгги суткада мамлакатда 14 мингтадан кўпроқ касалланиш ҳолати қайд этилган.