Франция ўрмонида бир ҳафтадан ортиқ вақтдан бери ёнғин давом этмоқда

Францияда Париждан тахминан 60 километр жануби-шарқда жойлашган машҳур Фонтенбло ўрмонида ёнғин бир ҳафтадан ортиқ давом этмоқда.

Маҳаллий BFM TV телеканали хабар беришича, 500 дан ортиқ одам ёнғин билан курашмоқда.

Ички ишлар вазири Лоран Нуньеснинг аниқлик киритишича, Париж минтақаси учун мисли кўрилмаган авиация ресурслари ёнғинни ўчириш учун сафарбар қилинган, аммо 13 июль оқшомига келиб ёнғин аллақачон 1300 гектар майдонни қамраб олган.

"Афсуски, асосий ёнғиндан беш километр узоқликда иккинчи ёнғин бошланди, у аллақачон 100 гектардан ортиқ майдонга тарқалди", деб таъкидлади у.

Икки киши ўт қўйишда гумон қилиниб ҳибсга олинди.

Ёнғин ўтган якшанба куни бошланган ва уни ўчириш ишлари кучли шамол ва торфли тупроқ туфайли қийинлашмоқда. Маҳаллий ҳокимият яқин атрофдаги аҳоли пунктларидан одамларни эвакуация қилмоқда. Ёнғиннинг тарқалиши бир нечта йўлларнинг ёпилишига ва темир йўл хизматининг тўхтатилишига олиб келди. Франсе 24 аввалроқ ёнғин ўрмоннинг тахминан 5 фоизини вайрон қилганини хабар қилган эди.