Флик «Реал»нинг тақдири ҳал бўладиган ўйинга қизиқмаётганини айтди

«Барселона» бош мураббийи Ханс-Дитер Флик Испания чемпионатининг 34-тури доирасида 3 май куни бўлиб ўтадиган «Эспаньол» — «Реал» учрашувини томоша қилмаслигини айтди.

«Мен «Реал» иштирокидаги ўйинни аниқ кўрмайман. Бу мен учун эмас. Агар бирор гап бўлса, мессенжердаги гуруҳимиз орқали менга хабар беришади!» — дея немис мутахассисининг сўзларидан иқтибос келтирмоқда журналист Фабрицио Романо.

«Барселона» 34-турда сафарда «Осасуна»ни мағлуб этди (2:1). Жамоа 34 та ўйиндан сўнг 88 очко билан Испания чемпионати жадвалида биринчи ўринни эгаллаб турибди ва битта захира ўйинига эга «Реал»дан 14 очко олдинда.

Жамоалар мавсум давомида жами 38 та ўйин ўтказишади. Шу билан бирга, 10 май куни «Барселона» ўз майдонида «Реал»ни қабул қилади.