Эрон билан можаро жаҳонда озиқ-овқат нархларини оширмоқда

Яқин Шарқдаги можаро кескинлашуви туфайли энергия нархлари ошди ва бу март ойида жаҳонда озиқ-овқат нархларининг ўсишига олиб келди. Бу ҳақда БМТнинг Озиқ-овқат ва қишлоқ хўжалиги ташкилоти маълум қилди.

Ташкилотнинг жаҳон бозорларидаги асосий озиқ-овқат маҳсулотлари саватининг қийматидаги ўзгаришларни акс эттирувчи индекси март ойида ўртача 128,5 пунктни ташкил этди. Бу февраль ойининг қайта кўриб чиқилган даражасидан 2,4 фоизга юқори.

Ташкилот бош иқтисодчиси Максимо Тореронинг айтишича, можаро бошланганидан бери нархлар ўсиши ҳозирча мўътадил даражада қолмоқда. Унинг сўзларига кўра, бу асосан нефть нархларининг ошиши билан боғлиқ бўлиб, қисман дон захираларининг катталиги ҳисобига жиловланмоқда.

Шу билан бирга, у огоҳлантиришича, агар можаро 40 кундан ортиқ давом этса ва ишлаб чиқариш харажатлари юқори бўлиб қолса, фермерлар ресурслардан камроқ фойдаланиши, экиш майдонларини қисқартириши ёки бошқа экинларга ўтиши мумкин.

Бу эса келгуси ҳосилларнинг камайишига олиб келиб, жорий йилнинг қолган қисми ва келаси йилда озиқ-овқат таклифи ҳамда нархларига таъсир кўрсатиши мумкин.

28 февралдан бери АҚШ ва Исроил Эронга ҳаво зарбалари бермоқда, бу эса 1340 дан ортиқ инсон ҳалок бўлишига олиб келди.

Эрон эса жавоб тариқасида Исроилга, шунингдек Иордания, БАА, Ироқ ва Форс кўрфази мамлакатларидаги АҚШ ҳарбий объектларига дронлар ва ракеталар билан зарбалар берди. Бу ҳужумлар қурбонлар, инфратузилманинг вайрон бўлиши, шунингдек жаҳон бозорлари ва авиация фаолиятининг издан чиқишига сабаб бўлди.