Бразилияда авиаҳалокат оқибатида уч киши ҳалок бўлди

Бразилиянинг Мату-Гроссо штатидаги Агуа-Боа шаҳридан тахминан 20 километр узоқликда кичик самолёт ҳалокатга учраши оқибатида уч киши ҳалок бўлди.

Бу ҳақда маҳаллий G1 телеканали ёнғин хизматига таяниб хабар берди.

Жабрланганларнинг шахси ҳали аниқланмаган. Самолёт Гояниядаги аэродромдан учиб кетган деб тахмин қилинмоқда. Унинг манзили номаълумлигича қолмоқда, чунки самолётда рўйхатдан ўтган парвоз режаси йўқ эди.

Самолёт ёнғин натижасида бутунлай ёниб кетган. Маҳаллий ҳокимият органларининг маълумотларига кўра, самолёт N401NA рўйхатга олиш рақамига эга Cessna бўлган, аммо у Бразилия Миллий фуқаро авиацияси агентлигида (ANAC) рўйхатдан ўтмаган.

Авиация ҳалокатларини текшириш ва олдини олиш маркази (CENIPA) ҳодисанинг ҳолатларини текширмоқда.