Буюк Британия бош вазири Борис Жонсон АҚШ президенти Дональд Трамп коронавирусдан соғайиши учун шифокорлар маслаҳатига амал қилиши лозимлигини айтди.
«Президент Трамп соғайиб кетишига ишонаман. У энг яхши (тиббий) ёрдамга эга. Муҳими, шифокорларнинг маслаҳатига амал қилишдир», — деган Жонсон. У Трампга фақат энг яхши тиббий тавсиялар берилишига ишончи комил эканлигини билдирган.
Борис Жонсоннинг ўзи ҳам апрель ойида коронавирус билан касалланиб, касалхонага ётқизилганди. Икки ҳафтадан сўнг у яна ўз ишига қайтган.
Эслатиб ўтамиз, Дональд Трамп ва унинг рафиқаси Меланияда 2 октябрь куни коронавирусга топширган тест жавоби ижобий чиққан. Бундан аввал Трампнинг маслаҳатчиси Ҳоуп Хиксда COVID-19 аниқланган, шу сабабли президент оиласи билан биргаликда Оқ уйда изоляция қилинганди. Трампнинг касаллиги тасдиқлангандан сўнг у Уолтер Рид номидаги ҳарбий-тиббиёт марказига ётқизилган.