Арағчи: "Эрон ҳеч қачон Ливаннинг ички ишларига аралашишга уринмаган"

Эрон ҳеч қачон Ливаннинг ички ишларига аралашишга уринмаган.

Бу ҳақда Эрон ташқи ишлар вазири Аббос Арағчи Байрутда жойлашган Al Mayadeen телеканалига берган интервьюсида айтиб ўтди.

У Эрон Ливанни биродар ва дўстона мамлакат деб билишини айтди.

"Эрон, Исроил ва Қўшма Штатлар ўртасидаги уруш биринчи кунданоқ Ливандаги можаро билан боғлиқ. Бизнинг позициямиз мутлақо аниқ: урушга чек қўйиш ва Ливанни ҳам ўз ичига олган қаршиликнинг барча жабҳаларида бир вақтнинг ўзида сулҳга эришиш керак", деб таъкидлади вазир.

У сулҳ музокаралари давомида Покистон бош вазири Шаҳбоз Шарифдан Ливанни меморандум шартларига киритишни сўраганини эслатди.

"Биз барча манфаатдор томонларга Байрутга қилинган ҳужум очиқ тажовузкорлик ҳаракати эканлигини очиқ айтдик ва биз жим турмаймиз", деб таъкидлади Арағчи.

Аввалроқ АҚШ давлат котиби Марко Рубио Вашингтонда Исроил ва Ливан ўртасидаги музокаралар иккинчи кундан бери давом этаётганини ва муваффақиятли натижага олиб келиши мумкинлигини айтган эди.