АҚШнинг Яқин Шарқдаги уруши Украинага катта зарба бердими?

АҚШнинг Яқин Шарқдаги уруши Украинага катта зарба бермоқда. "Bloomberg" колумнисти Марк Чемпионнинг фикрича, Вашингтоннинг ушбу қароридан энг кўп ютган томонлардан бири Россия бўлди, Украина эса яна бир бор Ғарб кун тартибида орқа ўринга сурилди.

Владимир Зеленский бу хавотирни аввалроқ очиқ айтган эди. У март ойида Яқин Шарқдаги уруш сабаб Украинага эътибор сусаяётганини ва ҳаво ҳужумидан мудофаа воситалари танқислиги кучайганини билдирган. "Reuters" ҳам март охирида Пентагон Украина учун мўлжалланган айрим қуролларни Яқин Шарққа йўналтириш эҳтимолини ёзган эди.

"Bloomberg" шарҳловчиси Марк Чемпионнинг ёзишича, Дональд Трампнинг Яқин Шарқда уруш бошлаши Украина учун “улкан зарба” бўлди. Муаллифнинг фикрича, бу можаро бир вақтнинг ўзида ҳам АҚШнинг Украинага эътиборини сусайтирди, ҳам Киев таянадиган Ғарб ресурсларини бошқа йўналишга буриб юборди.

АҚШнинг НАТОдаги доимий вакили Мэттью Уитакер Америка етакчиси Украинага ёрдам кўрсатиш бўйича Европа саъй-ҳаракатларини қўллаб-қувватлашни қайта кўриб чиқаётганини маълум қилди.

"Муҳокамаларнинг бориши (Европанинг Ҳўрмуз бўғозини очиш бўйича коалициядаги иштироки - таҳр.) билан таниш бўлган уч амалдорнинг хабар беришича, бунга жавобан Трамп НАТОнинг Европа давлатлари томонидан молиялаштириладиган Украина учун қурол-яроғ сотиб олиш ташаббуси PURL доирасида етказиб беришни тўхтатиш билан таҳдид қилган", — дейилади нашр хабарида.

Трампнинг ўзи "The Telegraph" нашрига берган интервьюсида Украина АҚШ муаммоси бўлмаслигига қарамасдан, Қўшма Штатлар НАТОга вақтида бу масалада ёрдам кўрсатганини эслатиб ўтди.

“Биз автоматик равишда, жумладан, Украина билан ҳам ёнма-ён эдик. Украина бизнинг муаммомиз эмас эди. Бу синов эди ва биз улар билан бирга эдик. Улар эса биз билан бирга бўлмади”, — деган у.