АҚШ шунчаки чиқиб кета оладими?

АҚШ Президенти Доналд Трамп мамлакатнинг NATO'дан чиқиш имкониятини кўриб чиқаётганини тасдиқлади — Reuters.

"Албатта. Бусиз иложи йўқ. Сиз менинг ўрнимда бўлганингизда буни кўриб чиқмаган бўлармидингиз?" — деди Трамп агентликка берган интервьюсида.

Sky News телеканали Доналд Трамп ҳақиқатан ҳам Қўшма Штатларни альянсдан чиқариб юбориши мумкинми, деган масалани таҳлил қилди. Шимолий Атлантика шартномасининг 13-моддасига кўра, ташкилотдан чиқмоқчи бўлган ҳар қандай давлат тегишли хабарнома топширганидан бир йил ўтиб буни амалга ошириши мумкин. Ушбу ҳужжат АҚШ ҳукуматига тақдим этилиши керак, шу боис Вашингтоннинг ўзи блокни тарк этмоқчи бўлса, жараён қандай кечиши номаълум бўлиб қолмоқда.

АҚШ қонунчилигига кўра, 2024 йилги ҳужжат давлат раҳбарига Конгресс розилигисиз халқаро иттифоқдан чиқиш тўғрисида қарор қабул қилишга рухсат бермайди. Бунинг учун Сенатнинг учдан икки қисми овози ёки махсус акт зарур. Қизиғи шундаки, мазкур қонун ҳаммуаллифи амалдаги Давлат котиби Марко Рубио ҳисобланади. Бироқ ҳозирда у альянсга танқидий ёндашмоқда ва агар америкаликлар Европа базаларидан фойдалана олмаса ёки Эронга қарши операцияда иттифоқчилар қўлловига эга бўлмаса, аъзоликдан мантиқ йўқ, деб ҳисоблайди.

"АҚШ шунчаки чиқиб кета оладими? Қисқа жавоб: биз буни аниқ билмаймиз. Аммо юридик экспертлар президент ташқи сиёсатдаги ваколатларига таяниб, мавжуд чекловларни четлаб ўтишга уриниши мумкинлигидан огоҳлантирмоқда", — деб ёзади телеканал.

Маълумот учун, 1949 йилдан бери бирор мамлакат NATO'ни тарк этмаган. Фақат 1966–2009 йилларда Франция ҳарбий тузилмаларда қатнашмаган, бироқ сиёсий аъзо бўлиб қолган эди.