АПЛ ташкил этилганидан бери бирорта ҳам маҳаллий мураббий чемпион бўла олмаган

Англия Премьер-лигасида яна хорижлик мутахассис чемпионлик шоҳсупасига кўтарилди.

«Арсенал»ни бошқараётган испаниялик Микель Артета ўз фаолиятида илк бор АПЛ ғолибига айланди.

Эътиборли жиҳати шундаки, Премьер-лига ташкил этилганидан буён ўтган давр мобайнида бирорта ҳам англиялик бош мураббий чемпионлик унвонини қўлга кирита олмаган. Мусобақа тарихидаги бош совринларнинг 13 таси шотландиялик сэр Алекс Фергюсонга, 6 таси испаниялик Пеп Гвардиолага, 3 тадан кубок эса португалиялик Жозе Моуриньо ҳамда франциялик Арсен Венгерга тегишлидир. Шунингдек, турли йилларда италиялик Карло Анчелотти, Антонио Конте, Роберто Манчини ва Клаудио Раньери, чилилик Мануэль Пеллегрини, шотландиялик Кенни Далглиш, германиялик Юрген Клопп ҳамда нидерландиялик Арне Слотлар ҳам АПЛда зафар қучишган.

Охирги марта англиялик мутахассис мамлакат чемпионлигини қўлга киритган воқелик 1991/92 йилги мавсумга тўғри келади — бу Премьер-лига ташкил этилишидан олдинги охирги мавсум эди. Ўшанда Говард Уилкинсон «Лидс Юнайтед» клуби билан чемпионлик шоҳсупасига чиққан эди.