Зеленский: "Ҳарбий қисмдан сўнг, ҳар қандай ҳолатда, тинчлик жараёни бўлишига ишончим комил"

Давосдаги Украина нонуштасида интернет орқали сўзлаган Владимир Зеленский Украинадаги уруш тинч йўл билан якунланишини айтди, бироқ Россиянинг қайси президенти Украина билан музокара олиб бориши ҳозирча аниқ эмас, дея таъкидлади.

"Ҳарбий қисмдан сўнг, ҳар қандай ҳолатда, тинчлик жараёни бўлишига ишончим комил. Музокаралар столи ҳам бўлади. Ва албатта тинчлик бўлади. Савол: Украина ким билан музокара олиб боради? Савол: Россиянинг қайси президенти билан. Бу Россиянинг амалдаги президентининг хоҳишига ҳам боғлиқ”, — деди Зеленский.

Зеленскийнинг сўзларига кўра, урушнинг тугаш вақти Ғарбнинг Россия билан тўқнаш келишдан қўрқмаслик, Украинага қурол-яроғ билан ёрдам бериш ва уни молиявий қўллаб-қувватлаш истагига боғлиқ.

"Ва бу Россия Федерациясининг хоҳишига ҳам боғлиқ, чунки бу уруш барибир тугайди", деди Зеленский.

Унинг сўзларига кўра, "Россия томони қонли урушдан дипломатияга ўтиш истагини намоён қилганида Киев музокараларга ўтиради".