Хоманаий: Эрон ҳар қандай ҳужумга жавоб қайтаришга тайёр

Эрон Олий раҳбари Оятуллоҳ Али Хоманаий чоршанба куни чиқиш қилиб, Исроил ёки АҚШ томонидан бўладиган ҳар қандай янги ҳарбий ҳужумга Эрон янада кучли зарба билан жавоб беришга тайёр эканини билдирди. У сўзларини давлат телеканали орқали эълон қилди.

«Бизнинг халқимиз на АҚШдан, на унинг занжирдаги ити — сионистик режимдан қўрқади», — деди Хоманаий. У яқинда Исроил билан 12 кунлик уруш давомида Эрон томонидан АҚШнинг Қатардаги Ал-Удейд ҳарбий базасига берилган зарбани эслаб ўтди ва Эрон бундан ҳам оғирроқ зарба бера олишини таъкидлади.

АҚШ ва Исроил яқинда Эрондаги ядровий иншоотларга ҳужум қилган эди, уларни ядровий қурол ишлаб чиқариш учун фойдаланилаётганликда айблаган. Эрон эса ядровий дастури фақат тинчлик мақсадларига хизмат қилишини таъкидламоқда.

Хоманаий Эрон дипломатларини «заифлик позициясидан эмас» иш олиб боришга ундади, бироқ бу билан нимани назарда тутганини очиқламади. Ўша куни Эрон парламенти АҚШ билан музокаралар фақат айрим шартлар бажарилгач бошланиши мумкинлигини билдирган эди. Бу шартлар қаторига Эрон ҳудудига янги ҳужумлар бўлмаслигига кафолатлар киради.

Axios нашрининг ёзишича, АҚШ ва Европа мамлакатлари август ойининг охиригача битимга эришишни сўнгги муддат сифатида белгилаган. Акс ҳолда, БМТ орқали халқаро санкцияларни тиклаш механизми ишга туширилиши мумкин.