Хитой АҚШга ноёб ер металлари етказиб бериш тизимини ишлаб чиқмоқда

Бунда уларнинг ҳарбий компанияларга сотилишини истисно этилади — Тhe Wall Street Journal

Газета манбаларига кўра, Хитой ҳукумати Қўшма Штатларга ноёб ер металлари ва бошқа маҳсулотлар экспортини соддалаштиришни, шу билан бирга, мудофаа саноатига алоқадор компанияларни қабул қилувчилар рўйхатидан чиқаришни режалаштирмоқда.

"Янги тизим фуқаролик мақсадларида фойдаланиладиган ноёб ер металлари етказиб берувчи Хитой компанияларига экспорт рухсатларини тезроқ олиш имконини беради. Янги қоидалар Пекинга, бир томондан, Вашингтон билан ноёб ер ресурслари экспортини рағбатлантириш бўйича келишувларни бажариш, иккинчи томондан эса, АҚШ армияси билан боғлиқ компанияларга етказиб беришни чеклаш имконини беради", дея ёзмоқда WSJ.

Доналд Трамп ва Си Жинпин 30 октябр кунги учрашувда АҚШ Хитой учун бож тарифларини пасайтириши, Пекин эса ноёб ер металлари экспортига қўйилган чекловларни бекор қилиши тўғрисида келишиб олишганди.