Бугун 29 март, 2024 йил, жума

O'ZB

ХДП вакили Расул Кушербоевга жавоб қайтарди: "Ёлғон хабарларни ким тарқатяпти?"

ХДП вакили Расул Кушербоевга жавоб қайтарди: "Ёлғон хабарларни ким тарқатяпти?"

Олий Мажлис Қонунчилик палатаси депутати Расул Кушербаевни кўпчилик холис, мустақил фикрга эга, халқ манфаатини ҳар нарсадан юқори қўювчи депутат сифатида яхши билади, ҳурмат қилади.

Лекин унинг ижтимоий тармоқлардаги саҳифалари орқали Ўзбекистон Халқ демократик партияси манзилига йўллаган, қатор интернет сайтларга жойлаштирилган айблови мени таажжублантирди. Унинг “ХДП тарғиботнинг “ёлғон орқали ҳужум“ тактикасини танламоқда”, дея кескин хулоса чиқариши кишини бироз ўйлантириб қўяди.

Р.Кушербаев икки ҳолатни хулосасига асос сифатида олибди.

Биринчи ҳолат. 31 июль куни “Муносабат” кўрсатувида Тошкент шаҳар Нуроний жамғармаси раиси, ЎзХДПдан халқ депутатлари шаҳар Кенгаши депутати Рустам Калоновнинг “дунёда либерал ғоялар инқирози” ҳақида билдирган шахсий фикри ҳамда умумий контекстдан узиб олинган ҳолатда ижтимоий тармоқларда тарқалган видеопарча билан боғлиқ.

Эътибор беринг, партиямиз вакили либерал ғоялар ҳақида ёлғон маълумот тарқатиш ҳақида ўйламаган, балки ўзининг шахсий фикрларини билдирган. Шахсий фикр билан ёлғон ахборот ўртасида катта фарқ борлиги кўпчиликка маълум, албатта.

Лекин шундай бўлса-да, умумий контекстдан узиб олинган ҳолатда ижтимоий тармоқларда тарқалиб кетган видеопарча нотўғри талқинларга сабаб бўлмаслиги, Либерал демократик партия вакилларида ноўрин хулосалар келтириб чиқармаслиги учун партиямиз Марказий Кенгаши Ахборот хизмати орқали узр сўраган эди.

Яъни, бу ҳолатда партиямиз вакили ЎзЛиДеП ҳақида ёлғон маълумот тарқатишга уринмаган, балки бугун дунёда либерал ғоялар инқирози ҳақида шахсий фикрларини билдирган.

Иккинчи ҳолат. Самарқанд вилоятида сув муаммосидан қийналган тадбиркорга ЎзЛиДеП ёрдам бергани, шунинг билан масала бартараф этилгани ҳақидаги ҳолатни кўриб чиқайлик.

Ҳолатга ойдинлик киритишга ҳаракат қиламиз.

ЎзЛиДеП ахборотига кўра, Самарқанд шаҳри Спитамен шоҳ кўчаси, 153-уйда жойлашган “Чордара қурилиш” МЧЖ раҳбари OʻzLiDeP Самарқанд вилоят кенгашига мурожаат қилган. Бу масала юзасидан OʻzLiDeP Самарқанд вилоят кенгаши раиси “Сувоқова” ДУК Самарқанд вилоят бошқармасига ёзма мурожаат йўллаган. Ҳудуддан ўтувчи, 1980-йилларда қурилган, диаметри 800 мм бўлган ичимлик сув қувури яроқсиз ҳолга келгани аниқланган. “Сувоқова” ДУК Самарқанд вилоят бошқармаси жавоб хатида Президент қарори асосида мазкур йўналишдаги қувурларнинг 200 метрлик қисми қайта янгилангани, яна 300 метрлик қисми янгиланиши ҳақида маълум қилинган.

Ўтган ҳафтада, 14 август куни жонли эфирга узатилган “Муносабат” кўрсатувида ЎзЛиДеП тадбиркорнинг муаммоси ҳал этилгани ҳақида ёлғон хабар бераётгани, аслида ҳудуддаги вазият ўзгаришсиз қолаётгани ҳақида айтган эдим.

Шундан кейин ЎзЛиДеП Самарқанд вилоят кенгаши матбуот хизмати бу муаммо ҳал этилаётгани ҳақида видеоматериал тайёрлади ва у 20 август куни партия расмий сайтида эълон қилинди.

Р.Кушербаев ЎзЛиДеП Самарқанд вилоят кенгаши матбуот хизмати тайёрлаган ўша маълумотга ишониб, хулоса чиқарган кўринади.

Аслида қувурлар алмаштирилиши билан боғлиқ муаммо шу кунларда, ҳатто бугун ҳам давом этмоқда. Тўғри, Президент қарори билан тасдиқланган дастур асосида ҳудуддаги эски қувурларнинг муайян қисми алмаштирилган. Аммо бу ишлар ҳам охиригача сифатли бажарилмаган.

Самарқанд шаҳри Спитамен шоҳ кўчасидаги “Чордара қурилиш” МЧЖ жойлашган ҳудуддаги (“Ҳунармандлар” МФЙ) сув қувурларидан ҳали ҳам сув сизиб чиқяпти, бир нечта кўлмаклар ҳосил бўлган. Қувурнинг янгиланган қисмида ҳам сув чиқиб, кўлмаклар ҳосил бўлган.

(Қувур жойлашган ҳудуддан темир йўл ўтган. 800 мм ўлчамдаги қувурда ёз ойларида босим пастроқ бўларкан, куз ва қиш ойларида босим оширилганда, қувурлар ёрилиб кетиши, бундан кўпчилик азият чекиши мумкин.)

ЎзЛиДеП Самарқанд вилоят кенгаши аввалги ёлғонни хаспўшлаш учун яна битта ёлғон хабар тайёрлаган бўлиб чиқмаяптими?

Шундай экан, савол: ёлғон хабарларни ким тарқатяпти? ЎзХДП вакилими ёки бошқаларми?..

Р.Кушербаев аниқ факт ва маълумотлар асосида шошмасдан фикр юритадиган, холис хулоса чиқарадиган, халқ манфаатлари учун сидқидилдан ишлайдиган депутат эканига шубҳа йўқ.

Баҳслар, тортишувлар ўз йўлига. Бугун асосий масала - битта бўлса ҳам халқни қийнаётган муаммо камайишида, деб ўйлайман.

Равшан Хомитов,

ЎзХДП Марказий Кенгаши сектор мудири

Манба: ЎзА

Киритилди: 14:12 23.08.2019. Ўқилди: 2154 марта. Фикрлар сони: 0 та.
telegram channel

Бўлимга тегишли қизиқарли хабарлар

Энг кўп ўқилган янгиликлар

бир кунда ҳафтада бир ойда

Фикр билдириш учун қайдномадан ўтишингиз сўралади ва телефон ракамни тасдиклаш керак булади!