Ўзбекистон ва Словакия президентлари Самарқандда стратегик шерикликни мустаҳкамлаш масалаларини муҳокама қилдилар

Ўзбекистон Республикаси Президенти Шавкат Мирзиёев Самарқанд шаҳрида бўлиб ўтаётган ЮНЕСКО Бош конференциясининг 43-сессияси доирасида Словакия Республикаси Президенти Петер Пеллегрини билан музокара ўтказди.

Ўзбекистон раҳбари матбуот хизмати хабарига кўра, суҳбат чоғида Ўзбекистон ва Словакия ўртасидаги стратегик шериклик ва кўп қиррали ҳамкорликни янада кенгайтиришнинг долзарб жиҳатлари муҳокама қилинди.

"Барча даражадаги икки томонлама алмашинувларнинг ижобий динамикаси, шунингдек, устувор йўналишлар бўйича ҳамкорлик мустаҳкамланаётгани мамнуният билан қайд этилди”, — дейилади хабарда.

Шунингдек, савдо ва инвестицияларни кўпайтириш, муҳим тармоқларда саноат кооперацияси лойиҳаларини кенгайтириш масалалари муҳокама қилинди.

"Ўзбекистондан тўқимачилик, чарм, мева-сабзавот ва бошқа талабга эга маҳсулотлар, Словакиядан эса каучук, автомобиль бутловчи қисмлари, фармацевтика ва бошқа саноат товарлари етказиб беришни кўпайтириш бўйича келишувга эришилди. Шу мақсадда миллий маҳсулотлар кўргазмаларини ташкил этиш, савдо уйларини очиш режалаштирилган", — дейилади хабарда.

Рақамлаштиришни ривожлантиришга ҳам алоҳида эътибор қаратилди. Банк киберхавфсизлигини мониторинг қилиш ва юкларни кузатишнинг илғор тизимларини жорий этиш бўйича қўшма марказ яратиш бўйича таклиф киритилди.

Словакия тадбиркорлари билан автомобиль бутловчи қисмлари, тайёр сут маҳсулотлари ишлаб чиқариш ва бошқа соҳаларда ҳамкорликни янада кенгайтиришга тайёрлиги тасдиқланди.

Хабар қилинишича, гуманитар ва таълим соҳасидаги алмашинувларни фаоллаштириш истиқболлари муҳокама қилинган. Икки давлат ректорларининг биринчи форумини 2026 йилда Братиславада ўтказиш, сайёҳлик кўргазмалари, ўзаро туризм кунларини ташкил этиш таклифи билдирилди. Шунингдек, уюшган меҳнат миграциясини йўлга қўйиш мавзуси ҳам муҳокама қилинди.

Кўп томонлама форумларда ўзаро ёрдам кўрсатиш, долзарб минтақавий ва халқаро муаммолар юзасидан фикр алмашилди.