Uzbekistan GTL бош директори изоҳи: «Ишчиларимиз узоқ вақт қурилиш майдонида қолиб кетгани учун уларда руҳий толиқиш бўлган»

Uzbekistan GTL МЧЖ бош директори Фахриддин Абдурасулов тўполон кўтарган ишчилар масаласига тўхталиб ўтиб, карантин сабаб уларнинг иш куни ортиб, дам олиш куни ўзгаришсиз қолгани сабаб ишчиларда руҳий толиқиш бўлганини маълум қилди, дея хабар берди «Дарё» мухбири.

Таъкидланишича, 24 октябрь куни ишчилари тўполон кўтарган Uzbekistan GTL заводида Энергетика вазирлиги томонидан пресс-тур ташкил этилган. Унда журналист ва блогерлар билан мулоқот қилган Uzbekistan GTL заводи бош директори Фахриддин Абдурасулов тўполон кўтарган ишчилар воқеасига муносабат билдирган

«Карантин жорий қилингани учун одамларимиз соғлиғини ўйладик. Ишчиларимизга карантин талабларидан келиб чиқиб, бир марта тест топширишгач уйга кетмасдан, кўпроқ ишлаш талабини қўйдик. Шу боис одамларимиз узоқ муддат қурилиш майдонида қолиб кетди. Бу эса уларда руҳий толиқишни келтириб чиқарди. Қолаверса, бир вақтнинг ўзида 12 минг кишини бир жойда ушлаб туриш жудаям катта масъулият талаб этади. Иш жараёнида камчиликларга йўл қўйилиши ҳам тайин. Аммо биз ҳудудимизда 2020 йил 7 июль куни коронавирус аниқлангани учун ҳушёр бўлишга ҳаракат қилдик. Шунингдек, лойиҳани ўз вақтида бажариш учун ишчиларимиздан кўпроқ ишлашни талаб қилганимиз ҳам бор гап. Шу сабаб камчиликларга йўл қўйилган. Аммо бугунги кунга келиб, хато-камчиликлар бартараф этилди», — дейди Фахриддин Абдурасулов

Фахриддин Абдурасуловнинг аниқлик киритишича, завод қурилишида бир вақтнинг ўзида 8 минг ишчи ишлаши белгиланган. Бироқ карантин сабаб ишлар сустлашгани учун масъуллар бир вақтнинг ўзида 12 минг ишчи кучидан фойдаланишга ҳаракат қилган. Шунингдек, илгари 22 кун ишлаб, 8 кун дам олган ишчилар раҳбарият талаби билан 45 кун ишлаб, 8 кун дам олиш режимига ўтган.

«Биз 45 кунлик иш ва 8 кунлик дам олиш тартибини жорий қилганимизда ҳам ишчиларнинг хоҳишига эътибор қаратганмиз. Уларга вазиятни тушунтириб, коронавирусга бир маротаба тест топширгач 45 кун ишлаб, кўпроқ пул олишларини таклиф қилганмиз. Агар улар хоҳласагина, 45 кун ишлашган. Хоҳламаса, уйига қайтишлари мумкин бўлган», — дейди масъуллар журналист ва блогерлар билан суҳбатда.

Эслатиб ўтамиз, ижтимоий тармоқлар ва Telegram’даги оммабоп каналларда 21 октябрь куни Enter Engineering компаниясининг Қашқадарё вилояти Ғузор туманидаги объектларидан биридаги ишчиларнинг норозилиги акс этган видеоёзувлар тарқалди. Ҳолатни изоҳлаган Enter Engineering компанияси матбуот хизмати ишчилар норозилигига нонушта ўз вақтида берилмагани сабаб бўлганини маълум қилди. Шундан сўнг Энергетика вазирлиги Uzbekistan GTL’даги вазият барқарорлашганини, барча муаммо ва масалалар жойида ижобий ҳал этилганини хабар қилди. Завод масъули Шуҳрат Арзиев эса ОАВ вакиллари билан мулоқотда Uzbekistan GTL заводи қурилишидаги ишчиларининг оммавий норозилигига уларнинг иш куни кўпайиб, дам олиш куни ўзгаришсиз қолгани ҳам сабаб бўлганини очиқлади.