Трамп Нетаняху иштирокида “Ғазодаги уруш тугаганини” яна бир бор таъкидлади

АҚШ президенти Дональд Трамп Исроил парламентида чиқиш қилиб, Ғазо секторидаги уруш тугаганини таъкидлади.

Президентнинг сўзларига кўра, Фаластиннинг ҲАМАС ҳаракати Ғазода ўт очишни тўхтатиш бўйича келишувда назарда тутилган барча шартларга амал қилишга рози бўлган.

Эътиборли жиҳати шундаки, бир кун аввал Исроил бош вазири Биньямин Нетаняху “Ғазога ҳужумлар ҳали тугамаганини” айтган эди. Бироқ Трамп айнан унинг иштирокида урушнинг тугаганини расман эълон қилди.

Трампнинг Исроилга ташрифи

Аввалроқ Дональд Трамп Исроилга йўл олган Air Force One самолёти бортида Ғазода урушни тугатилган деб эълон қилган эди.

АҚШ президенти бугун Ғарбий Қуддусдаги Исроил парламенти (Кнессет) биносига етиб келди.

Трампни бино олдида Исроил бош вазири Биньямин Нетаняху ва парламент спикери Амир Оҳана расман кутиб олди.

Шунингдек, президент парламентнинг меҳмонлар китобига имзо чекиб, бу кунни “буюк” ва “янги бошланиш” сифатида таърифлади.

Аввалроқ Трамп Тел-Авивдаги Бен Гурион аэропортида расмий маросим билан кутиб олинган эди.