Трамп: Исроил ва Эрон ўртасидаги уруш яна бошланиши мумкин

АҚШ президенти Дональд Трамп НАТО саммитида (Гаага шаҳрида) Исроил билан Эрон ўртасидаги уруш якунланганини ва томонлар сулҳдан мамнунлигини маълум қилди. Бироқ у шуни ҳам таъкидлади: "Қачондир" бу можаро яна бошланиши мумкин.

"Биз уруш тугаган, деб ҳисоблаймиз. Менимча, улар бир-бирига яна ҳужум қилмайди", — деди Трамп журналистларга саммит чоғида. У ҳар икки томон “мамнун” эканини ва “уйларига қайтишлари мумкинлигини” қўшимча қилди, уруш эса “оғир” ва “шафқатсиз” зарбалар билан кечгани боис томонлар чарчагани айтилди.

Шу билан бирга, АҚШ президенти можаронинг қайта бошланиши эҳтимолини истисно қилмади: "Яна бошланиши мумкинми? Ўйлайманки, қачондир мумкин. Эҳтимол, яқин орада ҳам бошланиши мумкин".

Трампнинг айтишича, уруш АҚШнинг Эрон ядро объектларига берган зарбалари натижасида тўхтаган. У бу зарбалар Эроннинг ядровий дастурини "тубдан йўқ қилгани"ни ва "йиллар орқага суриб қўйгани"ни таъкидлади. Трамп бу ҳаракатни "Американинг тийиб туриш қобилиятига бўлган ишончни тиклаш" деб баҳолади.

Кейинги ҳафтада Эрон билан музокаралар режалаштирилган бўлиб, эҳтимолий битим имзоланиши мумкин. Аммо Трамп бу битимнинг зарурлигига шубҳа билдирди: “Менимча, бу унчалик муҳим эмас”. Унинг сўзларига кўра, Эрон “ўз тинчлигига қайтмоқда”, шунингдек, ядровий келишув керакми йўқми — бунга бефарқлигини билдирди.

Трамп АҚШ зарбаларини “тезкор” ва “кучли” деб атади ҳамда Эрон ядровий материалларни кўчиришга улгурмаганини таъкидлади. Теҳрон расмийлари ҳозирча ядровий дастур ҳақидаги бу баёнотларга изоҳ бермади.