1994 йилнинг 25 февраль, жума куни Фаластиннинг Ал-Халил шаҳридаги “Иброҳим” масжидида қирғин содир бўлди: террорчи яҳудий бомдод намозини ўқиётганларга қарата ўқ очди.
Ҳодиса пайтида масжидда тахминан 800 киши бўлган, улардан 29 нафари ҳалок бўлди, камида 150 нафари яраланди. Ўлдирилганлар орасида 12-13 яшар болалар ҳам бор эди.
Терактни асли америкалик яҳудий, 37 ёшли ҳарбий врач Барух Гольдштейн амалга оширган эди. Ҳужум пайтида у ҳарбий кийимда бўлган, шунинг учун ҳам масжидга тўсиқсиз кира олган.
Террорчи оломон томонидан қуролсизлантирилди ва калтаклаб ўлдирилди.
Мазкур ҳодиса тартибсизликлар ва тўқнашувларга туртки берди. Шаҳарда комендантлик соати жорий этилди, қизиғи, у фақат фаластинликлар учун амал қилди.
Барух Гольдштейн иззат-икром билан дафн этилган. Унинг қабр тошига “Ўз жонини Таврот, яҳудийлар ва Исроил учун фидо қилган авлиё Барух Гольдштейн” деб ёзилган.
Manba: azon. uz