Швейцария Украина учун 2036 йилгача мўлжалланган бюджетни тасдиқлади

Швейцария Украинани қайта тиклаш учун 2036 йилгача яна 5 миллиард франк ажратишни режалаштирмоқда. Бу ҳақда мамлакат Иқтисодиёт бўйича котибияти баёнотига таяниб, RTS телерадиокомпанияси хабар берди.

«Швейцария Украинани қўллаб-қувватлашда муҳим рол ўйнашда давом этиш ниятида», — дейилади расмий ҳужжатда.

Баёнотга кўра, Швейцария ҳукумати мамлакатни қайта тиклаш бўйича узоқ муддатли мажбуриятларни ўз зиммасига олишга қарор қилган ва 2025 йилдан 2036 йилгача бўлган даврда ушбу мақсадлар учун 5 миллиард франк йўналтиради.

Маблағларни ажратиш босқичма-босқич амалга оширилади:

• 2028 йилгача: 1,5 миллиард франк ажратиш режалаштирилган. Шундан 342,25 миллион франки айнан жорий йилнинг ўзидаёқ ўтказиб берилади.

• 2029–2036 йиллар: Федерал кенгаш қолган 3,5 миллиард франкни тўлаш учун қўшимча молиялаштириш манбаларини топишни мақсад қилган.